Ομιλία Αποκάλυψης Μνημείου 2022
5η Οκτώβρη 2022
«Έι… γλυκοπάππο και γλυκογιαγιάμ’!
Σκωθέστε ασά ταφία, μαναχά αούτο το σημερινόν την ημέραν!
Τερέστε… τ’εσέτερα τα χάταλα π’ εφέκετε εσείς οι ξεριζωμέν’… σην Πατρίδαν τη πατρίδας. Οσήμερον εν χαρά.
Καμμίαν κ’ ενέσπαλαν τα πόνε και τα βάσανα π’ έσυρά τε.
Οσήμερον κρατούνε το κερίν, για τ’ εσάς τοι αποθαμέντς.
Τερέστε το μνημείον: Τ’ΕΣΕΤΕΡΟΝ ΕΝ’!
Άλλο μη κλαίτε και μη βαρκίζετε !
Κανείται το κλάψιμον και τα δάκρεα π’ εκυλύγαν σα μάγλα σουν.
Αδά σο μνημείον… είστουνε ούλ’ εσείς π’ εχάθετε άδικα και ούλ’ θα μανθάνε την ιστορίαν ε σουν.
Το πορπάτεμαν τη μάνας, με το μωρόν σην αγκάλεαν, να έρται βασανισμέντσα σην Ελλάδαν.
Ασ΄είνα τα πεινασμένα και τυραννισμένα χάταλα, εποίκαν οικογένειας και τα πουλόπα τουν έρθαν και σην Κω.
Εγαπέθαν ας’ αούτον τον έμμορφον κόσμον και αγάπεσαν κι ατοίν το νησίν κι άλλον πολλά.
Έι… εσείς π’ εφυέτε ασήν ζωήν, απέσ’ ση καρδίαν’ εμούν εποίκετε φωλέαν.
Έναν πράμαν να εξέρετε: Το προζύμ’ π’ εφέκετε καμμίαν κι θα χάται.
Και οι παλαιοί πα έλεγαν, οι Τραντέλλενες ασά σαχτάρε θα αναγεννίουνταν!
Τ’εμέτερα τα δάκρεα για τ’ ατά ντο έσυρέτε εσείς, ας είναι μνημόσυνα για τ’ εσάς.
Η ευλοΐα π’ εδέκετε, άνθεα και μανουσάκεα να ’ίνουνταν σα ψύα σουν!»
Κείμενο: Ιωάννης Βαμβακίδης, Ιδρυτικό Μέλος
Εκφώνηση: Ναβροζίδης Χαράλαμπος, Πρόεδρος